هەولێر-KDP.info- مەسروور بارزانی پێشوازیی لە باڵیۆزی کۆماری چین لە عێراق کرد و لە دیدارەکەدا دوارەوشی ناوچەکە و پەیوەندیەکانی چین لەگەڵ هەرێمی کوردستان و رێکارەکانی پێشخستنی ئەو پەیوەندیانە تاوتوو کران.
ئەمڕۆ 13/3/2018 مەسروور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە چین ویتچینگ باڵیۆزی کۆماری چین لە بەغدا و شاندی یاوەری کرد.
لەم دیدارەدا دوارەوشی ناوچەکە و پەیوەندیەکانی چین لەگەڵ هەرێمی کوردستان و رێکارەکانی پێشخستنی ئەو پەیوەندیانە تاوتوو کران.
باڵیۆزی چینی ستایشی رۆڵی هەرێمی لە بەرەنگاربوونەوەی تیرۆریزم کرد و گوتی، هەرێم لە دابینکردنی ئارامی و ئاسایش سەرکەوتوو بووە، ئەمەشیان زەمینەیەکی لەبار دروستدەکات بۆ ئەوەی هەرێم لە گشت بوارەکانی تر سەر لە نوێ رێگەی پێشکەوتنی زیاتر بگرێتەبەر.
باڵیۆزی چینی ئاماژەی بەوە دا کە وڵاتەکەی خوازیارە لە ڕووی ئابووریی و کەلتووریەوە پێوەندیی فراوانتری لەگەڵ هەرێمی کوردستان هەبێت.
لە بەرامبەردا مەسرور بارزانی خواستی هەرێمی کوردستانی بۆ فراوانترکردنی پەیوەندییە هەمە چەشنەکانی هەرێم لەگەڵ چین دەربڕی و ئاماژەی بە ئەوەدا کە کۆماری میللیی چین لە ئاستی نێودەوڵەتییدا پێگەیەکی بەهێزی هەیە و خوازیارین ئەم پێگە کارایە بۆ چارەیی کێشە چەقبەستوەکان و سەقامگیریی زیاتری ناوچەکە بەکار بهێنن.