Kurdî  ■  كوردی  ■  عربي
TUE, 19 JUN 2018 17:31 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ریفراندۆم زۆرێك لە ماسكەكانی خست
| KDP.info



عه‌بدولره‌حمان سدیق
رۆژانی دوای 25ـی ئەیلوول و رووداوەكانی دوای 16ـی ئۆكتۆبەری ئەمساڵ، زۆر شتی شاراوەی ناخی زۆرێك لە بەرپرسانی ناوخۆ و عێراقی خستەڕوو، كە زەمانێكە ئەو بەرپەرسانە پەردەپۆشیان كردووە و لەبەر زۆر هۆكاری خودی و بایەتی نەیاندركاندووە، لەوانەش بۆ نموونە:
یەكەم: دەركەوت بڕوایان بە دەستوور نییە، كەچی سەری زمان و بنی زمانیان باسی دەستوورە، ئەوان تەنیا ئەو ماددانەیان قەبووڵە كە لە بەرژەوەندیی خۆیانە، كەچی زۆر ماددەی دیكە هەن، ئەوان دژی دەوەستنەوە بۆ نموونە:
١- ئەم ناوچەیەی ئێمە لە دەستووردا ناوی هەرێمی كوردستانە، كەچی حەیدەر عەبادی لەناو پەرلەمان و لەنێو پەرلەمانتاراندا دەڵێت: هەرێمی باكووری عێراق، ئەمە لەكاتێكدا تەنانەت سەددام حوسێنی سەرۆكی ئەوسای عێراقیش قسەی وای نەدەكرد، چونكە ئەو دەیگوت: ناوچەی ئۆتۆنۆمی كوردستان.
٢- دەستوور دەڵێت: حكوومەتی ئیتیحادی، چونكە عێراق فیدڕاڵییە، كەچی ئەوان دەڵێن: حكوومەتی مەركەزی، كە حكوومەتیش مەركەزی بوو واتە هەرێمی كوردستانیش دەبێتە لامەركەزی، یان ئۆتۆنۆمی.
دووەم: رووداوەكان دەریانخست كە زمانی زبر و ناخێكی پڕ لە قین هەیە لای زۆرینەی عەرەبی عێراق بە سوننە و شیعەوە دژ بە كورد وەك نەتەوە و، دژ بە كوردستان وەك هەرێم و خاك.
سێیەم: رووداوەكانی كەركووك رووی راستەقینەی زۆر لایەنی دەرخست، وەك بەرەی توركمانی كە زیاتر لە حەشدی شەعبی دژ بە ئاڵای كوردستان و سیمبولەكانی كوردستان وەستانەوە و، زیاتر لە حەشد و سوپای عێراق دڵخۆشتر بوون بە كەوتنی كەركووك و هەوڵدان بۆ پڕكردنەوەی شوێن و پێگە و پۆستەكانی كورد.
چوارەم: رووداوەكان دەبڵ ستاندارداردی زلهێزەكانی زیاتر خستەڕوو، كاتێك ئەوان گڵۆپی سەوزیان بۆ عێراق هەڵكرد و خۆیان بێدەنگ كرد لە ئاست ئەو كارەساتەی بەسەر كورددا هات، زیانی ئەم هەڵوێستەشیان لە داهاتوودا بۆ دەردەكەوێت كە چ هەڵەیەكی ستراتیژیی گەورەیان كردووە.
پێنجەم: رووداوەكان رووی راستەقینەی ئەو دەوڵەتە ئیسلامییانەشی دەرخست كە هەڕەشەی داخستنی سنوور و برسیكردنیان لە گەلی موسڵمانی كورد كرد، ئەمە لە كاتێكدا هەر یەك لە توركیا و ئێران دەیانگوت ئابڵوقەی ئابووری سەر غەززە و قەتەر ناشەرعییە، كەچی گەمارۆی ئابووری سەر كوردی موسڵمان ئاساییە.
شەشەم: رووداوەكان رووی راستەقینەی كۆمكاری وڵاتانی عەرەبی دەرخست كە ئەوان لە بیری خۆیان بردەوە كە دەستووری عێراق دەڵێت: عێراق وڵاتێكی فرەنەتەوەیە، نەك دەوڵەتێكی عەرەبی.
حەوتەم: رووداوەكان پەردەی لەسەر رووی ئەنجوومەنی هاوكاریی ئیسلامی هەڵماڵی، كاتێك دەوڵەتە ئیسلامییەكان پشتیان لە چل ملیۆن كوردی نەوەی سەڵاحەددینی ئەیووبی كرد و پشتگیریی سنوورە دەستكردەكانی سایكس پیكۆ-یان كرد.
هەشتەم: رووداوەكان ماسكی لەسەر رووی راستەقینەی ئەزهەری بەناو شەریفی لادا، كاتێك ئامادە نەبوو رێز لە رای گشتی و زۆرینەی گەلی كوردستان بگرێت و ئەویش كەوتەوە داوی ئاوازی عروبە و عەرەبایەتیكردن و وەك بڵێی زمانحاڵی وەزارەتی دەرەوەی میسر بێت، نەك بڵندگۆیەك بۆ موسڵمانان.
نۆیەم: عێراق لە پێناوی چەواشەكردنی خەڵكی كوردستان لە رۆژانی دوای ریفراندۆمەوە، هات ژێرنووسێكی بە كوردی بۆ كەناڵی ئەلعیراقییە زیاد كرد و رۆژانەش تەنیا دە خولەكی هەواڵەكانی ئێواران بە كوردی و پاشان تەنیا دوو سەعات بە زمانی كوردی لە یەكێك لە كەناڵەكانی سەر بە ئەلعێراقییەوە زیاد كرد، وەك بڵێی تازە بە تازە لە زەمانی حوكمی زاتیی سەددام حوسێندا بین و، ئەوەندە مافە بەكورد رەوا ببینێت.
دەیەم: عێراق لە پەنای هێزی سەربازیدا گەڕاوەتەوە بۆ حوكمی عەسكەری و هاتووە هەردوو كەناڵی (كوردستان24 و رووداو)ی قەدەغە كردووە لە كاركردن لە تەواوی عێراقدا، بەوەش نەوەستاوە دەڕوات لە میسرەوە لەسەر مانگی دەستكردی نایلساتیش قەدەغەی پەخشیان بكات.
ئێستا ئیدی كاتی بەخۆداچوونەوەیە بۆ ئێمەی گەلی كوردستان پاش ئەوەی سەر لە نوێ دۆست و دوژمن و یار و نەیاری خۆمان ناسی، ئێستا كاتی خۆڕاگری و ئارامگرتن و بەرەنگاربوونەوەی دوژمنان و بنیادنانەوەی ژێرخان و سەرخانی وڵاتی خۆمانە، بە سیاسەتی نەفەسی درێژ و ئومێد و بڕوابوون بە خۆ و بە ئیرادەی گەڵی خۆمانەوە.

لە گۆڤاری گوڵانەوە




دوایین هەواڵەکان

"خێزانێكی كوردی ئێزدی چوونەتە شنگال و چارەنووسیان نادیارە"

TUESDAY, 19 JUNE 2018 16:06:04

شنگال-KDP.info- ماوه‌ی شه‌ش ڕۆژه‌ خێزانێكی كوردی ئێزدی له ‌سنووری قه‌زای شێخان به ‌مه‌به‌ستی كارێكی ئیداره‌ی سه‌ردانی قه‌زای شنگالیان كردووه‌، به‌ڵام تاوه‌كو ئێستا نه‌گه‌ڕاونه‌ته‌وه‌ و چاره‌نووسیان نادیاره‌.

 
"پێشمەرگە ئۆپەراسیۆن دژی داعشەكانی مەخموور ئەنجام دەدات"

TUESDAY, 19 JUNE 2018 14:06:23

مەخموور -KDP.info- چەند ڕۆژێكە تیرۆریستانی داعش لە سنووری مەخموور جووڵەیان زیاد كردووە و، وەك بەرپرسێكیش دەڵێت، ئەگەر داعش نیەتی ھەبێت، دەتوانێت شارەكانیش داگیر بكات، بەڵام پێشمەرگە ئامادەكاری دەكات بۆ لەنێوبردنیان. فەرماندەیەكی میحوەری مەخمووریش ئاشكرای كرد، بە نیازی ئۆپەراسیۆنن بۆ لەنێوبردنی داعشەکانی مەخموور.

 
"پەیامەكەی سەرۆك بارزانی، كلیلی چارەكردنی كێشەكانی ھەرێم و عێراقە"

TUESDAY, 19 JUNE 2018 13:06:18

ھەولێر-KDP.info- لایەنە سیاسییەكان، پەیامەكەی " سەرۆك بارزانی" بە ئەرێنی دەبینن و باوەڕیان وایە، كلیلی چارەكردنی كێشەكانی كوردستان و عێراقە. دەشڵێن، لە بری ئەوەی لە ڕاگەیاندنەكانەوە وەڵام و وەڵامكاری بكرێت، پێویستە لەسەر مێزی گفتوگۆ دابنیشن.

 
عارف ڕوشدی: لە چوارچێوەی پەیامەكەی سەرۆكدا، ئامادەكاری بۆ كۆبوونەوەی لایەنەكان كراوە

TUESDAY, 19 JUNE 2018 12:06:34

هەولێر-KDP.info- سەرۆك بارزانی، لە پەیامی جەژنی رەمەزاندا داوای لە گشت ھێزە سیاسییەكانی ھەرێمی كوردستان كرد، بۆ دەربازكردنی ئەم قۆناغە، دوای جەژن كۆ ببنەوە، راوێژكاری مەكتەبی سیاسیی پارتییش دەڵێ، خواستی سەرۆك بارزانی یەكڕیزیی نێوان لایەنەكانە و، دەست بە ئامادەكاری بۆ ئەنجامدانی كۆبوونەوەی لایەنەكان كراوە.

 
دادگای فیدراڵی، لەبارەی تانەی لایەنەكانەوە كۆ دەبێتەوە

TUESDAY, 19 JUNE 2018 12:06:11

بەغدا-KDP.info- سەرۆكی لیژنەی یاسایی لە پەرلەمانی عێراق گوتی، بڕیارە دووسبەی دادگای فیدراڵی كۆ ببێتەوە و تێیدا گفتوگۆ لەبارەی بڕیارەكانی پەرلەمانی عێراقەوە دەكات، كە لایەنەكان تانەیان لێ داوە، چونكە بڕیاری نایاسایی و نادەستوورین.

 


 
© 2018 Kurdistan Democratic Party, KDP