دهۆک-KDP.info- بەرەڤان حەمدى، رێڤەبەرێ گشتى ل وەزارەتا شەهید و ئەنفالکریان راگەهاند، پێشمەرگە و خەلکێ کوردستانێ پارچەیەک ژ پاراستنا ئیمناهى و ئاشتیا جیهانێ، ئەڤ پێرابوونێن عیراقێ لادانە ژ هەمى یاسایێن نیڤدەولەتى و دەستورى، بتنێ ململانەکا سیاسى و تائیفى یە دگەل کوردستانێ دکەت، ژبەر ڤێ ئێکێ کوردستانیان سەربەخۆیى هەلبژارت.

هەرێما کوردستانێ دگەل وەلاتێ عیراقێ ددوو قۆناغێن سەرەکیدا بوریە، قۆناغا بەرى 2003ێ، بەرنیاس ب حوکمێ دکتاتوریەتێ کۆ نیزیکى220 هزار کەسا دپرۆسیسا ئەنفال و کیمیابارانکرن و شەهید و ویرانکرنا گۆندێن کوردستانێ دزەرەرمەند بووینە، قوناغا دوویێ هاتیە بناڤکرن ب عیراقا نوویى، (بەرەڤان حەمدى)، رێڤەبەرێ گشتى ل وەزارەتا شەهید و ئەنفالکریان، بۆ مالپەرێ فەرمیێ پارتى دیموکراتى کوردستان گۆت:" ل قوناغا بەرى 2003ێ، خەلکێ کوردستانێ هاتینە ئەنفالکرن و زیندانکرن و سیدارەدان و کومەلکوژى ژلایێ حکومەتا بەعسا ژناڤجوویى دیتیە، لێ پشتى 2003ێ، دعیراقا نوویدا حکومەتا هەرێما کوردستانێ، هەولدا لسەر سێ ئاستا کار لسەر کومەلکوژیا کوردستانیان بکەت، ئاستێ ئێکێ، بریکا دادگەهێ داخوازیا مافێن زەرەرمەندان بکەت، نوکە ئەو دادگەهە لاواز بوویە، جونکى هەمى کیشە ئێکلا نەکرن و تێدا خەلکێ کوردستانێ زەرەمەند بوویە و حکومەتا عیراقێ بەرپرسیار بوویە بەرامبەر وان تاوانان".

(بەرەڤان حەمدى)، خویاکر:" دقوناغا دوویێ حکومەتا هەرێمێ رابوویە ب خەملاندنا وان زیانان یێن ددرەهەقێ ئەرد و گۆندێن کوردستانیاندا کرین، ژسالا 1963 تا 2003ێ ژلایێ لێژنەکا پسبورڤە، کۆ کوژمێ زەرەرمەندیێ دبیتە 384 ملیار دولار، دڤى ماوەیدا چ زەرەرێن (مرۆڤى یان مادى) بیت، ئاستێ سیێ ژى دەرئێخستنا یاسایەکێ بوو ژپەرلەمانێ عیراقێ، کۆ خەلکێ زیان پێکەڤتى بهێتە قەرەبووکرن، لێ ب مخابنیڤە تا نوکە حکومەتا عیراقێ نەیا بەرهەڤبوویە وێ یاسایێ رەوانەیى پەرلەمانى بکەت بو پەسەندکرنێ و خەلکێ ئەهوارە یێن شیعە قەربووکرن، ئەڤە ژى جوداهیەک بوو ژلایێ حکومەتا عیراقێ ڤە هاتیەکرن".

(بەرەڤان)ى، زەلالکر:" پشتى 2003ێ، حکومەتا هەرێما کوردستانێ برێکا دستورێ عیراقێ سەرەدەرى دگەل کاودانان کر، لێ حکومەتا عیراقێ پێگیرى ب یاسا و دستورى نەکر و ئەڤ کێشە مانە هەلاویستى، هەروەسا بوودجا پێشمەرگەیى و فەرمانبەرێن هەریمێ یێن هەلگرن ناسنامەیا عیراقێ برى و یاسایا حەشدا شەعبى دەرباسکر، ئەڤە دجیتە دچارچوڤەیى پێشلکاریێن دەستوریدا، جونکى قەیرانا دارایى ل هەرێمێ پەیداکر،  نوکە ژى یێ هەولا تێکدانا سنۆرێن کوردستانێ دکەن".

(بەرەڤان حەمدى)، ئاخڤت:"ئەگەر حکومەتا عیراقێ پێکڤەژیان پاراستبایە و مافێن هەمى پێکهاتەیان ب یەکسانى بەلاڤکربایە، لوێ باوەرێ بووم ریفراندۆم ل کوردستانێ نەدهاتە ئەنجامدان، لێ پشتى ئەنجامدانا ریفراندۆمێ و خەلکێ کوردستانێ و هندەک ژ نەتەوا عەرەب ژى سیاسەت و ئیدارەکرنا  نەرەوا یا حکومەتا عیراقێ رەتکرى، عیراقێ پەنا بۆ گەڤا بر و یا رژدە لسەر دژایەتیکرن و هێرشکرنێ لسەر مافێن کوردستانیان، بتنێ بۆ هندى لبن دەستێ عیراقەکا تائیفى و دکتاتوریدا بژین، ئەڤ دژایەتیە پتر خەلکێ کوردستانێ رژد دکەت داخوازا جودابوونێ ژعیراقێ بکەت".

رێڤەبەرێ گشتى ل وەزارەتا شەهید و ئەنفالکریان گۆت:" پێشمەرگە و خەلکێ کوردستانێ پارچەیەکە ژ پاراستنا ئیمناهى و ئاشتیا جیهانێ و دواقیعیدا نەهێلایە تیرۆر دەرباسى ئاخا وێ ببیت، ئەڤ پێرابوونێن عیراقێ لادانە ژ هەمى یاسایێن نیڤدەولەتى و دستورى و بتنێ ململانەکا سیاسى و تائیفى یە دگەل کوردستانێ دکەت، ژبەر ڤێ ئێکێ کوردستانیان سەربەخۆیى هەلبژارت".

هەلز عەلى سەلیم