هەولێر-KDP.info- مەکتەبی سیاسی پارتی دیموکراتی کوردستان لە پەیامێکدا بەبۆنەی (یەكی موحەرەم)سەری ساڵی كۆچییەوە وێڕای پیرۆزبایی لەسەرجەم موسڵمانان دەکات هاوکات رایدەگەیەنێت، یەكخستنی هەوڵ و كۆششەكان و هەنگاونان بۆ گەیاندنی میللەتەكەمان بە كەناری ئارامیی هەمیشەیی و رەخساندنی زەوینەی بونیاتنانی دەوڵەتی سەربەخۆی نیشتیمانی بە گرینگ دەزانێ.
دەقی پیرۆزبایی مەكتەبی سیاسی پارتی دیموكراتی كوردستان
بەبۆنەی (یەكی موحەرەم)سەری ساڵی كۆچییەوە:
بەناوی خوای بەخشندەو میهرەبان
بە بۆنەی هاتنەوەی (یەكی موحەرەم)سەری ساڵی نوێی كۆچییەوە، گەرمترین پیرۆزبایی خۆمان ئاراستەی سەرجەم موسڵمانانی كوردستان و جیهان دەكەین، هیواخوازین ئەم بۆنە پیرۆزە هەوێنی خێرو بەرەكەت و خۆشی یەكجارەكی بێت بۆ هەموو لایەك و مایەی كۆتایی هێنان و بنبڕكردنی ئێش و ئازارو دەردەسەری و نەهامەتیەكانی گەلەكەمان بێت، هەروەها هاندەری زیاتری چەسپاندنی ئاشتەوایی و پێكەوەژیان بێت بۆ تێكڕای چین و توێژو پێكهاتەكانی كۆمەڵگەی كوردستان و دوورخستنەوەو وەلانانی ئەقلیەت و خولیای توندوتیژی و شەڕانگێزی و دووبەرەكی لە ناو كۆمەڵەكەماندا.
ئەمڕۆ گەلی كوردستان بە تێكڕای پێكهاتە جیاجیاكانیەوە بە هەلومەرجێكی زۆر هەستیاروچارەنووسسازدا رەت دەبێت، بۆیە داواكارین و لەو بۆنە پیرۆزەشدا بە گشت لایەك هەوڵی پتەوكردنی زیاتری گیانی برایەتی و تەبایی و یەكدەنگیی بدەین، بەتایبەتی لەرووی چەسپاندنی سەقامگیریی و ئاسوودەیی و باشتركردنی باری گوزەرانی هاووڵاتیان، هەروەها یەكخستنی هەوڵ و كۆششەكان و هەنگاونان بۆ گەیاندنی میللەتەكەمان بە كەناری ئارامیی هەمیشەیی و رەخساندنی زەوینەی بونیاتنانی دەوڵەتی سەربەخۆی نیشتیمانی.
جارێكی دیكە یەكی موحەرەم، سەری سڵی ۱٤۳۹ی كۆچی، لە سەرجەم موسڵمانان پیرۆزبێت...
مەكتەبی سیاسی
پارتی دیموكراتی كوردستان