Kurdî  ■  كوردی  ■  عربي
THU, 21 JUN 2018 08:00 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

سەرۆک بارزانی: 25ی 9، یانی راگەیاندنی دەوڵەت.. نابێ كوردانی تاراوگه‌ له‌ ده‌نگدان بێبه‌ش بكرێن
| KDP.info


هەولێر-KDP.info-  سه‌رۆكى هه‌رێمى كوردستان (مەسعوود بارزانی) ئه‌مڕۆ له‌گه‌ڵ توێژى رۆژنامه‌نووسان و هونه‌رمه‌ندان كۆبوویه‌وه‌ و لە وەڵامی پرسیارێکدا سەبارەت بە رۆژی راگەیاندنی دەوڵەتی کوردستان لە دوای راپرسییدا رایگەیاند، رۆژی 25-9 کە دەنگدان بە سەربەخۆیی دەدرێ بە واتایی راگەیاندنی دەوڵەتە، بەڵام دوای ئەوە گفتوگۆ لەبارەی پرسی سنوور و نەوت و پرسگەلی دیکەوە لەگەڵ بەغدا بەردەوام دەبێ.

(سه‌رۆك بارزانى) له‌ كۆبوونه‌وه‌كه‌دا رایگەیاند، ئه‌نجامدانى راپرسى دژى بنه‌ما نێوده‌وڵه‌تییه‌كان نییه‌ و مافى چاره‌نووس مافێكىى ئاسایى و یاساییه‌ به‌ گوێره‌ى هه‌موو به‌ڵگه‌نامه‌ یاساییه‌كان و هیچ كارێكمان نه‌كردووه‌ له‌ دژى یاساى نێوده‌وڵه‌تى بێت، ئه‌وانه‌ى ئێستا نیگه‌رانن له‌ ریفراندۆم، ده‌بوایه‌، زۆر پێشتر بێنه‌ ده‌نگ و قسه‌ بكه‌ن، ریفراندۆم نه‌ كارتى فشاره‌ و نه‌ موزایه‌ده‌یه‌.
روونیشیكرده‌وه‌، چوونه‌وه‌ى كورد بۆ به‌غدا به‌ دڵپاكى هه‌ڵه‌ بووه‌، لێره‌دا دانى پێداده‌نێم هه‌ر 2003 چووینه‌وه‌ به‌غدا به‌و دڵپاكییه‌ هه‌ڵه‌ بووین.

سەرۆکی هەرێمی کوردستان رایگەیاند، تا ئێستا 55 مادده‌ى ده‌ستوورى پێشێل كراون و به‌ بیریشم نایه‌ت هیچ رێككه‌وتنێكمان جێبه‌جێ كرابێت. بۆ نموونه‌ رێككه‌وتین له‌سه‌ر ره‌شنووسى یاساى نه‌وت و غاز، نه‌یان كرد، رێككه‌وتین له‌سه‌ر بودجه‌ و پڕچه‌ككردنى پێشمه‌رگه‌، ئه‌وان نه‌یانهێشت یه‌ك فیشه‌كیش بۆ پێشمه‌رگه‌ بێت. ئێستاش له‌ شه‌ڕى مووسڵ رێككه‌وتنى زۆرمان كردن و تا ئێستا باسمان نه‌كردووه‌، به‌شێك له‌ حه‌شدییه‌كان گوێ به‌ قسه‌ى كه‌س ناده‌ن و پێشێلكارى زۆر زۆر گه‌وره‌یان كردووه‌.

(سه‌رۆك بارزانى) گوتیشى: ئێستا عێراق نه‌ كۆمارییه‌ و نه‌ په‌رله‌مانییه‌ و نه‌ دیموكراتییه‌ و بووه‌ته‌ حكوومه‌تێكى تائیفى مه‌زهه‌بى، ئه‌گه‌ر سیستمى سیاسى عێراق به‌ زۆرینه‌ بێت، كورد له‌ هه‌موو شتێكدا دۆڕاوه،‌ چونكه‌ هه‌میشه‌ كورد كه‌مینه‌ ده‌بێت له‌ ئه‌نجوومه‌نى نوێنه‌راندا.
سه‌رۆكى هه‌رێمى كوردستان ئاشكرایشی کرد، له‌م ماوه‌یه‌دا فشارێكى زۆر هه‌بوو بۆ دواخستنى ریفراندۆم چ له‌ لایه‌ن هاوپه‌یمان و وڵاتان و كه‌سانى دۆسته‌وه‌، به‌ڵام ئه‌وان هیچ جێگره‌وه‌یه‌كیان بۆ ریفراندۆم نه‌بوو، له‌به‌ر ئه‌وه‌ ئێمه‌ سوورین له‌سه‌ر ئه‌وه‌ى له‌ 25ى سێپتێمبه‌ر ریفراندۆم بكه‌ین.

(سەرۆک بارزانی) رایگەیاند، ده‌وڵه‌تى كوردستان له‌سه‌ر بنه‌ماى یه‌كسانى و ئازادى و به‌ سیستمى كۆمارى دیموكراتى ده‌بێت. هه‌روه‌ها گوتى: بیر له‌ توندوتیژى ناكه‌ینه‌وه‌ و به‌ خۆشى و به‌ گفتوگۆ ده‌مانه‌وێت سه‌ربه‌خۆ بین، ده‌ستوورى عێراق هیچ ئیعتبارێكى نه‌ماوه‌ چونكه‌ پێشێلكرا و كه‌سیش له‌سه‌رى نه‌هاته‌ ده‌نگ.

سەرۆکی هەرێمی کوردستان لە وەڵامی پرسیارێکدا سەبارەت بە رۆژی راگەیاندنی دەوڵەتی کوردستان لە دوای راپرسییدا رایگەیاند، رۆژی 25-9 کە دەنگدان بە سەربەخۆیی دەدرێ بە واتایی راگەیاندنی دەوڵەتە، بەڵام دوای ئەوە گفتوگۆ لەبارەی پرسی سنوور و نەوت و پرسگەلی دیکەوە لەگەڵ بەغدا بەردەوام دەبێ.

(سه‌رۆك بارزانی) ده‌رباره‌ی بڕیاری به‌شداریی كه‌ركووك له‌ راپرسی بۆ سه‌ربه‌خۆیی و سازدانی كۆبوونه‌وه‌یه‌ك له‌و شاره‌دا رایگه‌یاند، وه‌كچۆن مرۆڤ بێ دڵ ناژی، كوردستانیش بێ كه‌ركووك نابێ. كه‌ركووك ناسنامه‌كه‌ی كوردستانییه‌ و ده‌بێ، به‌ڵام شاری عه‌ره‌ب و توركمان و مه‌سیحییشه‌.
هه‌ر له‌و باره‌وه‌ ڕایگه‌یاند، له‌ پاشه‌ڕۆژێكی نزیكدا ئه‌نجوومه‌نی باڵای ڕیفراندۆم له‌ كه‌ركووك كۆبوونه‌وه‌ ساز ده‌دات.
 
هه‌روه‌ها ده‌رباره‌ی داوای كوردانی تاراوگه‌ له‌ بێبه‌شنه‌كردنیان له‌ بڕیاردان له‌ مافی چاره‌نووس له‌ راپرسیدا، (سه‌رۆك بارزانی) رایگه‌یاند، ده‌بێ كارێك بكرێ بۆ ئه‌وه‌ی كوردانی ده‌ره‌وه‌ی وڵات له‌ مافی ده‌نگدان بێبه‌ش نه‌كرێن.
 



دوایین هەواڵەکان

وەزارەتى خوێندنى باڵا، لیستى زانکۆ باوەڕپێکراوەکانى تورکیا و ئێرانی بڵاو كرده‌وه‌

THURSDAY, 21 JUNE 2018 00:06:18

هه‌ولێر-KDP.info-  وەزارەتى خوێندنى باڵا و توێژینەوەى زانستیى حکوومەتى هەرێمى کوردستان پێداچوونەوەى بە لیستى زانکۆ باوەڕپێکراوەکانى وڵاتانى (تورکیا – ئێران) کرد و لیستێکى نوێی بڵاو كرده‌وه‌.

 
مه‌كته‌بی سه‌رۆك سه‌رخۆشی له‌ شاخەوان غەریب ده‌كات

THURSDAY, 21 JUNE 2018 00:06:05

بەناوی خودای گەورە و میهرەبان

به‌ڕێز شاخەوان غەریب

بەبیستنی هه‌واڵی كۆچی دوایی كاكە(شڤان)ـی كوڕت خەمبار بووین.

پارتی سه‌رخۆشی له‌ خانەوادەی مەلا حاجی دێلۆیی ده‌كات

THURSDAY, 21 JUNE 2018 00:06:33

بەڕێزان خانەوادەی مەلا حاجی دێلۆیی

خەمبار بووین بە بیستنی هەواڵی کۆچی دوایی پێشمەرگەی هەدوو شۆڕشی مەزنی ئەیلوول و گوڵان، کادیری تێکۆشەر و دڵسۆزی پارتی و رێبازی بارزانی، ئەندامی مەکتەبی رێکخستن و کەسایەتیی دیاری دەڤەری پشدەر (مەلا حاجی دێلۆیی).

"بۆ گەڕانه‌وه‌ی پێشمه‌رگه‌ بۆ سنووری خانه‌قین سبه‌ی خۆپێشاندان دەکرێ"

WEDNESDAY, 20 JUNE 2018 16:06:14

خانه‌قین-KDP.info-  به ‌هۆی ئه‌وه‌ی مه‌ترسییه‌كی گه‌وره‌ له‌سه‌ر خانه‌قین هه‌یه‌ و به‌رده‌وام كرده‌وه‌ی تیرۆریستی لێ ئه‌نجام ده‌درێت و چه‌ندین گوند به‌و هۆیه‌وه‌ چۆڵ كراون و خه‌ڵكێكی زۆر بوونەته‌ قوربانی. عامر رەفعەت دەڵێ، ئیدی سبه‌ی له‌ خانه‌قین خۆپێشاندان بۆ گەڕانه‌وه‌ی هێزی پێشمه‌رگه‌ بۆ ئه‌و ناوچانه‌ ده‌ست پێ ده‌كات و خه‌ڵكی خانه‌قین مان ده‌گرن و دووكانه‌كانیان داده‌خه‌ن .

 
"زیاتر له ‌20 هه‌زار په‌نابه‌ر گه‌ڕاونه‌ته‌وه‌ عێراق و هه‌رێم"

WEDNESDAY, 20 JUNE 2018 16:06:22

هه‌ولێر-KDP.info- به‌ڕێوەبه‌ری كۆچ و كۆچبه‌ران گوتی، له‌ شه‌ڕی داعش و قه‌یرانی داراییدا شه‌پۆلێكی كۆچكردن له‌ هه‌رێمی كوردستانەوە بۆ ده‌ره‌وه‌ ده‌ستی پێ كرد، به‌ڵام له‌ دوای كۆتاییهاتنی شەڕی داعش كۆچكردن پێچه‌وانه‌ بووەته‌وه‌، به‌ جۆرێك له‌ دوو ساڵی ڕابردوودا زیاتر له‌20 هه‌زار كه‌س گه‌ڕاونه‌ته‌وه‌ بۆ عێراق، كه‌ 39%یان په‌نابه‌ری هه‌رێمی كوردستانن و گه‌ڕاونه‌ته‌وه‌ هه‌رێم و به‌رنامه‌یه‌كیشیان داناوه‌ هه‌ر ئاواره‌یه‌ك بگه‌ڕێته‌وه‌ هاوكاریی دارایی پێشكه‌ش ده‌كرێت.

 


 
© 2018 Kurdistan Democratic Party, KDP