دهۆک-KDP.info- لاوێن دهۆکێ ل رۆژا جیهانێ یا لاوان راگەهاند، لاوێن کوردستانێ پێشتەڤان و پێشخەر بووینە بۆ پاراستنا دەستکەفتێن مللەتێ کورد، ئەڤرۆ ژى ب هەمان روحیەت پێشتەڤانن بۆ سەرئێخستنا ریفراندۆمێ و بجه ئینانا هیڤیا هەر کوردستانیەکى.
(خالد ئەتروشى)، ئەندامێ سەرکردایەتیا لاوان و بەرپرسێ مالا لاوان ل دهۆکێ، بۆ مالپەرێ فەرمیێ پارتى دیموکراتى کوردستان راگەهاند:" ریفراندۆم پرسەکە و گرێدایى چارەنڤیسێ مللەتەکى یە، بەلکو پرۆژەکێ کوردستانیێ مەزنە ژبۆ رزگارکرنا کوردان ژبن دەستێ و داگیرکەران، جونکى لاو پێشخەر بووینە بۆ پاراستنا دەستکەفتێن مللەتێ کورد، ئەڤرۆ ژى ب هەمان روحیەت پێشتەڤانن بۆ سەرئێخستنا ریفراندۆمێ و بجه ئینانا هیڤیا هەر کوردستانیەکى".
(خالد ئەتروشى)، دیارکر ژى:" هیڤیە خەلکێ مە بزانیت ریفراندۆم و هەلبژارتن دوو پروسەیێن ژ ئێک جودانە، ریفراندۆما هەرێما کوردستانێ بۆ دیارکرنا چارەنڤیسێ مللەتێ کوردە، هەلبژارتن بۆ دیارکرنا دەستهەلاتێ یە و هەلبژارتنا نوونەرانە بۆ وان جهان، ژبەر ڤێ ئێکێ لاو پێشتەڤانن بۆ سەرئێخستنا ریفراندۆمێ و پرۆژەیى دامەزراندنا دەولەتا کوردى".
(رێڤینگ شێخکى)، دەبارەیى بابەتى گۆت :" لاوێن کوردستانێ هەردەم ئاشتخواز بووینە بۆ پێکڤە ژیانێ، نوکە ژى برێکێن ئاشتیانە داخوازا مافێن مللەتێ خۆ یێن شەرعى دکەن، ئەنجامدانا ریفراندۆمێ تاکە رێکا ئاشتیێ یە بۆ دامەزراندنا دەولەتا کوردى".
(هلبین سەلیم)، زەلالکر :"لاو ئاڤاکەرێن ئاشتیێ نە، ژبەر ڤێ ئێکێ پێشتەڤانن بۆ دەستڤەئینانا مافێن مللەتێ کورد برێکێن ئاشتیێ، ریفراندۆم تاکە رێکا ئاشتیانە بۆ دامەزراندنا دەولەتا کوردى، جونکى ئەم مللەتەک ئاشتى خوازین و دڤێ قۆناغێ دا بەهرا پتریا دەولەتێن جیهانى پێشتەڤانیێ ل سەربەخۆیا کوردستانێ دکەن".
هەلز عەلى سەلیم