ئازا حەسیب قەرەداخی

پاش تاقیکردنەوی هەموو شێوازەکانی رێکخستنی پیکهاتەکان لە عێراقدا و شکستهێنانی گشتیان بە فیدرالییشەوە، گەلی کوردستان جگە لە سەربەخۆیی بژادەیەکی دیکەی نەماوە بۆ درێژەدان بە مانەوەی سیاسی لە عێراقی هەرگیز بە دەوڵەتنەبوودا.
بۆ سەربەخۆییش گەل کوردستان زۆر رێگەی لەبەردەمدایە. لە ناویاندا پەیڕەکردنی ریفراندۆمی هەڵبژاردووە.
کەواتە ریفراندۆم بۆ بڕیاردانی چارەنووسە. خەڵکی کوردستان بە بەڵێ یان نەخێر وەڵامی یەک پرسیار دەداتەوە. ئایا دەتەوێ کوردستان سەربەخۆ بێ؟.
بەم مانایە جگە لە سەربەخۆیی، ریفراندۆم بۆ تشتێکی تر ناکرێ.
کە سەربەخۆییش بەدیهات، هەموو گەلی کوردستان سەربەخۆ دەبێ بەو هاووڵاتییانەشەوە کە بە نەخێر دەنگیان داوە، یان هەر نەچوونەتە سەر سندووقی دەنگدان.
کە سەربەخۆ بووین، هەموو ژیانی سیاسیمان سەربەخۆ دەبێ. تەنیا حزبێک بە جیا لەوانی دی سەربەخۆ نابێ. ئەو حزبانەش سەربەخۆ دەبن کە ئێستا رابەرایەتیی گەورەترین و دژوارترین هەڵمەتی دژی سەربەخۆیی دەکەن و، هەموو توانا سیاسی و ئیعلامی و رایەڵەکانی پەیوەندییان لەو پێناوەدا خستۆتە گەڕ.
کە کوردستان سەربەخۆ دەبێ، هەموو کایەی ئابووریمان سەربەخۆ دەبێ و دەرگاکانی گەشەکردن بەسەر کوردستان دەکرێنەوە و، دەوڵەتانی دراوسێ و جیهان بۆ برەودان بە بەرژەوەندییاکانیان و دۆزینەوەی هەلی بزاوتی ئابووری، سەرمایەگوزاری و بازرگانی، لە ئێستا زیاتر روو لە کوردستان دەکەن.
کە کوردستان سەربەخۆ بوو، سەروەریی سیاسی و سنوور و بڕیار کوردستانی دەبێ بە پلەی ئیمتیاز و لە چوارچێوەی یاسا نێودەوڵەتییەکان و لەسەر بنەمای رێكکەوتننامەی نەتەوە یەکگرتووەکان رێک دەخرێن نەک لە چوارچێوەی ئەوەی بۆ عێراق دەشێ.
کە کوردستان سەربەخۆ بوو، پەرلەمان یاساکانی لەبەر رۆشنایی دەستوورە کارپێنەکراوەکەی عێراقدا نانووسێتەوە. بەڵکو یاسای کوردستانی پوخت لە بەر رۆشناییی دەستووری کۆماری کوردستاندا دادەڕێژێ و پەسەندی دەکات.
سەرۆک بارزانی بە تەنیا سەربەخۆ نابێ. بەڵکو وەک هاووڵاتییەک لەناو زیاتر لە پێنج ملیۆن هاووڵاتی سەربەخۆدا، سەربەخۆ دەبێ.
وەکوو هەموو هاووڵاتیانی کوردستان کە قوربانیی زۆریان داوە و خوێن و فرمێسکی زۆر و زەوەندیان بۆ سەربەخۆیی رشتووە و ئێستا شایستەی ترۆپکی سەربەخۆیین، سەرۆک بارزانییش لە پای ماندووبوونی خۆی لە ماوەی زیاتر لە نیو سەدە پێشمەرگایەتی و بۆ پادداشتدانەوەی هەموو بارزانییەکان و خەباتی نەپساوەی ماڵباتێک کە لە ماوەی زیاتر لە یەک سەدە چەندینجار ئەنفال کراون، بەڵام لە کۆڕی خەبات و بەرخودانی نیشتمانی نەکشاونەتەوە، سەربەخۆ دەبێ.
سەرۆک بارزانی لە پرۆسە و خەباتی سەربەخۆییدا شەرەفی ئەوەی پێ بڕاوە کە لە ریزی هەرە پێشەوەی رابەرایەتیکردنی گەیشتن بە سەربەخۆییدایە. ئەم شەرەفەش لە خۆڕا نەهاتووه‌تە دی، بەڵکو حیکمەتی لێکگرێدانی مەرجە ئیقلیمی و نێودەوڵەتی و ناوخۆییەکان لەگەڵ و جەسارەتی بڕیاردانی سیاسیی سەرکردایەتیکردنی گەورەترین جەنگ لە دژی دەوڵەتی تیرۆر، دەرفەتی رابەرایەتی بۆ سەرۆک بارزانی خەمڵاندووە. لەم دەرفەتە هەڵکەوتووەشدا خودان بارزانی نەبووینایە، لە پێچەلپێچەکانی ترس و گومان و خۆ بە بچووک و بێتوانازانی و راکردن بە دوای دەستکەوتی مایەپووچدا ون دەبووین.