هەولێر-KDP.info- لە دیداری نێوان راوێژکاری ئەنجوومەنی ئاسایشی هەرێمی کوردستان و باڵیۆزی بەریتانیا لە عێراق پرسی ریفراندۆمی هەرێمی کوردستان تاوتوو کرا و باس لەوە کرا کە گەلانی ناوچەکە دەبێت بە یەکترقبووڵ کردن و بە شێوەیەکی ئاشتیانە کێشەکانیان چارە بکەن تاکو گشت پێکهاتەکانی ناوچەکە بە ماف و داخوازیەکانیان شاد ببن.
ئەمرۆ 15/6/2017 (مەسروور بارزانی) راوێژکاری ئەنجوومەنی ئاسایشی هەرێمی کوردستان پێشوازیی لە (فرانک بەیکر ) باڵیۆزی بەریتانیا لە عێراق و کونسووڵی گشتیی بەریتانیا لە هەرێمی كوردستان کرد.
لەم دیدارەدا دوا پێشهاتەکانی دەڤەرەکە و پێشڤەچوونەکانی شەری دژ بە داعش تاوتوێ کران و هەردوولا کۆک بوون لە سەر هەماهەنگیی زیاتر لە پێناو بەردەوامیی جەنگی دژ بە تیرۆر و چارەسەریی گشت ئەو کێشە لەمێژینانەی کە لە دەڤەرەکەدا زەمینەخۆشکەر بوونە بۆ سەرهەڵدانی هزری توندڕۆیی. هەروەها جەخت لە سەر ئەوە کرایەوە کە هیچ ڕووداو و پێشهاتێک کاریگەریی لە سەر هاوپەیمانیی و هاوکاریی هەردوولا لە شەری دژ بە تیرۆردا نابێت.
هەر لەم دیدارەدا پرسی ریفراندۆمی هەرێمی کوردستان تاوتوو کرا و باس لەوە کرا کە گەلانی ناوچەکە دەبێت بە یەکترقبووڵ کردن و بە شێوەیەکی ئاشتیانە کێشەکانیان چارە بکەن تاکو گشت پێکهاتەکانی ناوچەکە بە ماف و داخوازیەکانیان شاد ببن.