هەولێر-KDP.info- ئەنجوومەنی وەزیرانی هەرێمی كوردستان، لە پەیامێكدا پیرۆزباییی یادی 119 ساڵەی ڕۆژنامەگەریی كوردی و 19 ساڵەی دامەزراندنی سەندیكای ڕۆژنامەنووسانی كوردستانی لە ڕۆژنامەنوووسان و میدیاكارانی كورد پیرۆز كرد و، پشتگیری بۆ مافەكانیان دووپات كردەوە، هیوای سەركەوتنیشی بۆ خواستن و داوای لێ كردن پیشەییانەتر ئەرك و كارەكانیان ئەنجام بدەن.
ئەمە دەقەكەیەتی:
لە یادی ڕۆژی ڕۆژنامەگەریی كوردی و دامەزراندنی سەندیكای ڕۆژنامەنووسانی كوردستاندا، سڵاو و دروود بۆ گیانی مامۆستا (میقداد میدحەت بەدرخان) و تەواوی ئەو ڕۆژنامەنووس و میدیاكارانەی كوردستان دەنێرین كە ژیانیان بە وشەی كوردی بەخشی و لەو پێناوەدا گیانیان بەخت كرد. لەم یادەدا بە ڕێزەوە ئەو ڕۆژنامەنووسە دلێرانەی لە ڕووماڵی شەڕی دژی داعشدا گیانیان بەخشی و شەهید بوون، یان بەركەوتن و بریندار بوون، بەبیر دەهێنینەوە. ئەم یادە لە تەواوی ڕۆژنامەنووسان و میدیاكاران و دەزگا ڕۆژنامەوانی و میدیاییەكانی كورد پیرۆز دەكەین، هیوای سەركەوتن و پێشكەوتنی بەردەوامیان بۆ دەخوازین.
لەم یادەدا بە ڕێزەوە ڕۆڵی ڕۆژنامەنووسان و میدیاكارانی كورد و كوردستان و قوربانیدان و خۆبەختكردنیان لە قۆناغەكانی شۆڕش و ڕاپەڕینەكانی كوردستان و بەرەنگاربوونەوەی دوژمنان و تیرۆر و تیرۆرستان، هەروەها لە بەشدارییان لە بنیاتنان و پێشخستن و بەرەوپێشبرنی كۆمەڵگە و هۆشیاركردنەوەیدا هەڵدەسەنگێنین و تەواوی پشتگیریمان بۆ ماف و ئازادییەكانی ڕۆژنامەنووسان و میدیاكاران و ئازادیی نووسین و ڕادەربڕین و پەخش و بڵاوكردنەوە، دووپات دەكەینەوە.
وەك زۆر لایەنی دیكەی كۆمەڵگەی كوردستان، بە خۆشحاڵییەوە بواری ڕۆژنامەگەری و میدیاییش لە هەرێمی كوردستان پێشكەوتنێكی بەرچاوی بەخۆیەوە بینیوە و بە تایبەتیش لەم ساڵانەی دوایی و لە كاتی ڕووماڵی شەڕی دژی تیرۆردا، ڕۆژنامەنووسان و میدیای كوردستان قۆناغێكی دیكەیان تێپەڕاند و سەلماندیان كە دەتوانن هاوشانی میدیای جیهانی كار بكەن و زۆر جاریش ببنە تاقە سەرچاوەی هەواڵ بۆ ئاژانسە ڕۆژنامەوانی و میدیاییەكانی جیهان، كە ئەمەیش مایەی خۆشحاڵی و شانازییە بۆ هەرێمی كورستان و دەستخۆشییان لێ دەكەین.
لەم یادەدا وێڕای دووبارە پیرۆزباییمان لە ڕۆژنامەنووسان و میدیاكارانی كورد، داواكارین پیشەییانەتر و بە شێوەیەكی پرۆفیشناڵتر كار و ئەركەكانیان ئەنجام بدەن و هەموو ئەو بنەما و بەها و پرەنسیپانە بپارێزن كە ڕۆژنامەگەری و میدیای پیشەیی و پرۆفیشناڵی لەسەر دامەزراوە، تا بتوانن خزمەتی زیاتری كۆمەڵگە و ئێستا و داهاتووی كوردستان بكەن.
ئەنجوومەنی وەزیرانی هەرێمی كوردستان
22/4/2017