Kurdî  ■  كوردی  ■  عربي
SUN, 21 JAN 2018 09:36 Erbil, GMT +3
پارتی دیموکراتی کوردستان
نوێبوونەوە . دادپەروەری . پێکەوەژیان
 

ئەڵمانیا: ئێمە و کۆمەڵی نێودەوڵەتییش پێویستمان بە کوردستانە
| KDP.info


 

هەولێر-KDP.info-  (سەرۆک بارزانی) پێزانینی هەبوو بۆ هاوکارییەکانی ئەڵمانیا لە شەڕی دژ بە تیرۆر کە لە تەنگانەدا یارمەتیی کوردستانیان داوە؛ هاوکات جەختی لە بەردەوامیی پیوەندیی نێوان هەرێمی کوردستان و ئەڵمانیا کردەوە و وەزیری دەرەوەی ئەڵمانیایش ڕایگەیاند، "ئێمە و کۆمەڵی نێودەوڵەتییش پێویستمان بە ئێوەیە."

 

ڕۆژی پێنجشەممە 20ـی 4ـی 2017، لە سەلاحەددین، (مەسعوود بارزانی) سەرۆكی هەرێمی كوردستان، پێشوازی لە (سیگمار گابڕیێڵ) جێگری ڕاوێژكار و وەزیری دەرەوەی ئەڵمانیا و شاندێكی یاوەری كرد كە پێكهاتبوو لە (ڕینهۆڵد ڕۆب) ئەندامی پارلەمانی ئەڵمانیا و (فرانز جوزێف كرێمپ) باڵیۆزی ئەڵمانیا لە عێراق و (مارك ئیكهۆرن) كۆنسووڵی ئەڵمانیا لە هەولێر و ژمارەیەك بەرپرس و ڕاوێژكاری وەزارەتی دەرەوەی ئەڵمانیا.
 
 
لە دیدارەكەدا وەزیری دەرەوەی ئەڵمانیا سوپاسی گەلی كوردستان و هێزی پێشمەرگەی كرد كە شەڕی تیرۆریستانیان كردووە و جیهانیان پاراستووە، هەروەها ستاییشی خۆڕاگری و قوربانیدانی خەڵكی كوردستانی كرد لەو شەڕەدا و پێزانینیشی بۆ ئازایەتی پێشمەرگە هەبوو لە شەڕی دژی تیرۆریستاندا. جەختیشی لەوە كردەوە كە وڵاتەكەی بەردەوام دەبێت لە مەشق و ڕاهێنانی پێشمەرگە و گەیاندنی پێداویستیی پزیشكی و هەروەها پاككردنەوەی ناوچە ئازادكراوەكان لە مین و پاشماوەی تیرۆریستان.
 
لەبەرانبەردا (سەرۆك بارزانی) سوپاسی گەل و حكوومەتی ئەڵمانیای كرد كە یارمەتیدەر و پشتیوانی گەلی كوردستانن لە شەڕی تیرۆر و لە وتەیەكدا باسی لە پەلاماری تیرۆریستان بۆ سەر كوردستان و خۆڕاگری و قوربانیدانەكانی پێشمەرگەی كرد لە شەڕی تیرۆریستاندا.
 
لە بەشێكی دیكەی كۆبوونەوەكەدا بارودۆخی مەیدانیی ئۆپەراسیۆنی ئازادكردنی مووسڵ و قۆناغی دوای داعش و تەحەدیات و گرفتەكانی ئەو قۆناغه تاوتوێ كرا.
 
ئاییندەی هەرێمی كوردستان و ڕیفراندۆم تەوەرێكی دیكەی ئەو دیدارە بوو و، بە دوورودرێژی باسی مێژووی گەلی كوردستان لەگەڵ دەوڵەتی عێراق كرا لە سەد ساڵی ڕابردوو و، (سەرۆك بارزانی) ئەوەی خستەڕوو كە پڕۆسەی ڕیفراندۆم بۆ ئەوەیە كە جیهان ڕای كوردستانیان لەبارەی ئاییندەی كوردستان بزانێت و جەختی لەوە كردەوە پڕۆسەی سەربەخۆیی كوردستان پڕۆسەیەكی ئاشتیانە و لەڕێگەی دیالۆگ و لێكتێگەییشتن دەبێت و لەپێناو ڕێگەگرتن لە سەرهەڵدانی كێشە و گرفتەكانە.
 
لەدوای ئەو كۆبوونەوەیە سەرۆكی هەرێمی كوردستان و وەزیری دەرەوەی ئەڵمانیا لە پرێسكۆنفرانسێكدا ناوەڕۆكی كۆبوونەوەكەیان بۆ دەزگەكانی ڕاگەیاندن خستەڕوو.
 

لە کۆنفڕانسێکی ڕۆژنامەوانییه‌ هاوبەشه‌كه‌دا، کە پاش کۆبوونەوەی ئەم بەیانییەی سەرۆکی هەرێمی کوردستان و وەزیری دەرەوەی ئەڵمانیا ساز درا، (سەرۆک بارزانی) لە دەستپێکدا سپاسی گەلی کورد و خۆیشی بە ئەڵمانیا گەیاند کە لە کاتی شەڕی تیرۆریستاندا بەهانای هەرێمی کوردستانەوە هاتوون و سەربازانیان مەشقیان بە پێشمەرگە کردووە؛ گوتیشی کە کۆبوونەوەیەکی باش و سەرکەوتوویان ئەنجام داوە.

هاوکات وەزیری دەرەوەی ئەڵمانیا ڕایگەیاند، سپاس بۆ ئێوە و ئەو گفتوگۆیەی ئەنجاممان دا، وڵاتەکەمان ڕیزی زۆر بۆ ئێوە و گەلی کوردستان دادەنێ، تەنیا ڕێز نەبوو بۆ شەڕ لەگەڵ دەوڵەتی ئیسلامی، بەڵکە بۆ هەموو ئەو سەخاوەتەش بوو بۆ لەخۆگرتنی پەنابەران و حەواندنەوەیاندا، هەڵبەت بەراورد بە ڕێژەی دانیشتوانی کوردستان و ڕێژەی ئاوارەکان، نەک بۆ ئێمە بەڵکە بۆ تەواوی جیهان جێی ڕێز و بایەخ بوو و ڕێزێکی یەکجار گەورەتان هەیە لە بەرانبەر بەو کارەی کردووتانە.
لەبارەی دانی چەک بە هێزی پێشمەرگەی کوردستان وەزیری دەرەوەی ئەڵمانیا هەروەها ڕایگەیاند، ئێمە کارێکمان کرد کە پیشووتر لە ئەڵمانیا قەدغە بوو، دانی چەک بە ئێوە بە واتای بایەخی ئەڵمانیایە بە هەرێمی کوردستان، ئێمە دەمانزانی داعش تەنیا هەڕەشەیەک نییە تەنیا بۆ ئێوە و عێراق، بەڵکە بۆ ئەورووپا و جیهانیش بوو، بۆیە بەشداریمان لەو جەنگەدا کرد، سپاستان دەکەین لەوەی بەرگریتان لە کیشووەەری ئەورووپاشدا کردووە نەک هەر ناوچەکەی خۆتان.
ئەو جەختی کردەوە، ئێمە لەپێناو گێڕانەوەی سەقامگیریی ئێوە و عێراق و ناوچەکە کار دەکەین، ئێمە و کۆمەڵی نێودەوڵەتییش پێویستمان بە ئێوەیە، هەڵبەت ئێمەیش دەمانەوێ کار بکەین بۆ ئاوەدانکردنەوەی ناوچە وێرانبووەکان و گێڕانەوەی ئاوارەکان بۆ زێدی خۆیان.

لە وەڵامی پرسیارێکدا لەبارەی سازدانی ڕاپرسی، (سەرۆک بارزانی) رایگەیاند، بەڵێ بڕیاری ڕیفراندۆم دراوە و لایەنەکان ئێستا کار دەکەن بۆ پێکهێنانی کۆمیتەیەک بۆ ئەم پرسە و سازدانی ڕاپرسی.
(سەرۆک) ڕوونی کردەوە، ڕیفراندۆم بۆ ئەوەیە جیهان لە بڕیاری گەلی کوردستان تێ بگات چیی دەوێ، ئەمە بە واتای دەستبەجێ ڕاگەیاندنی دەوڵەت نییە، هەورها ئێمە نامانەوێ بەڕێی توندوتیژی ئەو کارە بکەین، خۆی دەوڵەتی کوردستان بۆ کۆی ناوچەکە مایەی ئارامی دەبێ.
دواتر لەبارەی بەشداریی پێشمەرگە لە شەڕی مووسڵ، هەروەها ڕێژەی هاوکارییەکان بەگوێرەی پێویست بووە، (سەرۆک بارزانی) ڕایگەیاند، بەر لە دەستپێکردنی شەڕی مووسڵ لەگەڵ عێراق و هاوپەیمانان پلانی هاوبەشمان دانا، سەرەتا پێشمەرگە هێڵی بەرگریی داعشانی تێک‌شکاند ئێنجا هێزەکانی عێراق پیشڕەوییان کرد.. شەڕ ئێستا سەختە چونکە کەوتووەتە کۆڵانە تەنگەکانی ئەو شارە، هەڵبەت بابەتەکە وابەستەی کاتە و دواجار تەواو تێک‌دەشکێ، بەڵام ئەمە بە مانای کۆتایی یەکجارەکیی داعش نابێ و ڕەنگ بە جۆری دیکە بمێنێتەوە.. دەرباری چەک نەخێر لە ئاستی پێویستدا هاوکاریی نەکراوین.

ئینجا لەبارەی ڕاپرسی و پرسی سەربەخۆییی باشووری کوردستان (زیگمار گابریێل) گوتی، ئەڵمانیا و ئەورووپایش پێویستیان بەوەیە بایەخ بە هەرێمی کوردستان بدەن و، کارێک بکەن شێوازی ژیان لێرە پێش بکەوێ و ڕێ بگرن لەوەی جارێکی دی خەڵکی ئێرە نەکەوێتەوە بەردەم هەڕەشەی تیرۆریستانەوە.
لەبارەی داهاتووی پێوەندییەکانی هەرێمی کوردستان و وڵاتەکەیەوە پاش سازدانی ڕاپرسی، (زیگمار گابریێل) دەڵێ، ئەو دەرەنجامە پێوەندی بە ئێمەوە نییە قسەی لەبارەوە بکەین، ئەمە پرسێکی پێوەست بە عێراق و کوردستانە، ئەوانن کە بڕیار دەدەن، هەڵبەت هەر هاوکارییەک لە لایەن ئێمەوە بۆ عێراق و هەرێمی کوردستان لە ڕووی ئاوەدانی و سەقامگیرییەوە پیویست بێ دەیکەین.
(زیگمار گابریێل) گوتیشی، باشترین شت بۆ داهاتووی کوردستان چێیە، کورد خۆی دەیزانێ نەک ئێمەی ئەڵمانیایی، بەڵام بۆ ئێمە کوردستان گرینگە و دەمانەوێ ئەم هەرێمە لە هەموو ڕوویەکەوە پێش بکەوێ ڕزگاری بێ لە ئایدۆلۆژیای توندڕۆ، دەبێ بیر لە داهاتوویان بکرێتەوە، ئێمە دەمانەوێ و دەبێ کارێک بکرێ هەم عێراق و هەم کوردستان لە ئاشتیدا بژین، ئیمکانیات و سەروەتی باش هەیە و دەتوانن لە بوارەکانی پێشەسازی و کشتوکاڵ پێش بکەون.
ئەو دووپاتی کردەوە کە، پێوەندییەکانی هەرێمی کوردستان و ئەڵمانیا پاش ڕاپرسی، بابەتێکە پێوەندی بە خۆیانەوە هەیە. ئەوەی ئێمە دەبینین، دەمانەوێ ململانێی توند نەیەتە ئاراوە و بە هۆی ڕاپرسی و بڕیار لە چارەنووس هەروەک (سەرۆک بارزانی) گوتی، بە گفتوگۆ بێ.
 




دوایین هەواڵەکان

سامی ئەتروشی: دیاره‌ كه‌ تاران دەیەوێ کێشەکانی نێوان بەغدا و ھەولێر چارە بکرێن

SATURDAY, 20 JANUARY 2018 21:01:46

هه‌ولێر-KDP.info-  پەرلەمانتارێکی پێشووی یەکگرتووی ئیسلامیی کوردستان لە پەرلەمانی عێراق، پێی وایە، لە ئێستا و پاشه‌ڕۆژیشدا پارتی و یەکێتی دوو ھێزی سەرەکی و گرینگن لە پڕۆسەی سیاسیی ھەرێمی کوردستان و دەشڵێ، سەردانی شاندی باڵای حکوومەتی ھەرێم بۆ ئێران، واتای ئه‌وه‌یه‌ كه‌ تاران دەیەوێ کێشەکانی نێوان بەغدا و ھەولێر چارە بکرێن.

 
نێچیرڤان بارزانی گەیشتە تاران

SATURDAY, 20 JANUARY 2018 18:01:53

هەولێر-KDP.info-  سەرۆکوەزیرانی کوردستان نێچیرڤان بارزانی کەمێک پێش ئێستا گەیشتە تاران.

"عەرەبە هاوردەکانی سەرگەڕان ستەم لە کورد دەکەن"

SATURDAY, 20 JANUARY 2018 18:01:22

سەرگەران-KDP.info- بەڕێوەبەری ناحیەی سەرگەڕان ئاشکرای کرد، پیلانی بەعەرەبکردنی سنووری ناحیەی سەرگەڕان بەردەوامە و عەرەبە هاودرەکان ببنە حەشد و ستەم لە کورد بکەن.

 

"پەکەکە لە مەرزی سیپەی هەڵەبجە سەرانە لە خەڵکی وەردەگرێت"

SATURDAY, 20 JANUARY 2018 16:01:27

هەولێر-KDP.info- ماوه‌ی سێ ڕۆژه‌ په‌كه‌كه‌ هێزێكی چه‌كداری ناردووه‌ته‌ شاخه‌كانی هەو‌رامان له‌ نزیك مه‌رزی لاوه‌كیی سیپه‌ له‌ گوندی ده‌ره‌یمه‌ڕی سه‌ر به‌ پارێزگای هه‌ڵه‌بجه‌، بازگه‌ی له‌ هانه‌نه‌وه‌ داناوه،‌ ئەو شوێنه‌ كۆتاییی ئه‌و ڕێیه‌یه،‌ کە وڵاغداره‌كانی هه‌ورامان له‌وێ باره‌كانیان داده‌گرن و كۆڵبه‌رانی ڕۆژهه‌ڵاتی كوردستان به ‌كۆڵ ده‌یگوازنه‌وه‌ بۆ سنووری ئێران، به‌ڵام به‌ هاتنی ئه‌و هێزه‌ی په‌كه‌كه‌ سه‌رانه‌یان له‌سه‌ر وڵاغداران و كۆڵبه‌ره‌كان داناوه‌ و ده‌بێ بۆ باری هه‌ر وڵاغێک بڕی 60 هه‌زار تمه‌ن و كۆڵبه‌ره‌کانیش ٣٠ هه‌زار تمه‌ن سه‌رانه‌ به‌ په‌كه‌كه‌ بدەن.

نێچیرڤان بارزانی و حه‌یده‌ر عه‌بادی پابه‌ندبوون به‌ ده‌ستوور، دووپات ده‌كه‌نه‌وه‌

SATURDAY, 20 JANUARY 2018 15:01:01

بەغدا-KDP.info-  نێچیرڤان بارزانی سەرۆکوەزیرانی هەرێمی کوردستان لە بەغدا لەگەڵ حەیدەر عەبادی سەرۆکوەزیرانی عێراق کۆ بووەوە و، به‌رده‌وامیی ئه‌و كۆبوونه‌وه‌ و دیدارانه‌یان به‌ مه‌به‌ستی هه‌رچی زوو ته‌واوكردنی ڕێكاره‌كانی ناردنی مووچه‌ی مووچه‌خۆرانی هه‌رێمی كوردستان و كردنه‌وه‌ی فڕگه‌كان‌، دووپات كرده‌وه‌‌.

 


 
© 2017 Kurdistan Democratic Party, KDP