ئەستەنبۆل- KDP.info/ دوای هێرشەكانی رۆژی شەممە و یەك شەممەی ئەم هەفتەیەی پولیسی توركیا بۆ سەر خۆپێشاندەرەكانی مەیدانی تەقسیمی شاری ئەستەنبۆل، بارودۆخەكە ئاڵۆزتر بوو و رۆژی دوو شەممەیش زیاتر لە 900 هەزار كەس لە ئەستەنبۆڵ دەستیان بە مانگرتن كرد.
لەم بارەیەوە ماڵپەڕی ئیلكە خەبەری توركی بڵاوی كردووەتەوە كە بۆ دەربڕینی نارەزایەتی لە دژی هەڵوێستی حكوومەت و پولیسی توركیا رۆژی دوو شەممە زۆربەی هەرە زۆری ئەندامانی سەندیكاكانی توركیا بە مەبەستی پشتگیری كردن لە خۆپێشاندەرەكانی مەیدانی تەقسیم دەستیان بە مانگرتن كرد و پولیسی توركیایش هێرشی كردە سەر مانگرتووەكان.
لەم بارەیشەوە جێگری سەرۆك وەزیری توركیا بولەنت ئارنج ئاماژەی بەوە كردووە كە پولیس مۆڵەت بە هیچ جۆرە گردبوونەوەیەكی نایاسایی لە هیچ شوێنێكی توركیا نادات و ئەگەر هێزی پولیس بۆ كونترۆڵ كردنی باوردۆخەكە تێر نەكات ئەوا حكوومەت ئامادەیە كە بۆ بڵاوە پێكردنی خۆپێشاندەرەكان و كونترۆڵ كردنی بارودۆخەكە سوپا و هێزی سەربازیش بەكار بهێنێت.