دهۆك-KDP.info- سەرۆكی ئەنجومەنی پارێزگای دهۆك ڕایگەیاند، كاركردن بۆ باشترکردنی ڕەوشی كارەبای دهۆك بەردەوامە و، بۆ كەمكردنەوەی نرخی پارەی مووەلیدە ئەهلییەكانیش داوایەكیان ئاراستەی وەزارەتی كارەبا كردووە.
فەهیم عەبدوڵڵا، سەرۆكی ئەنجومەنی پارێزگای دهۆك، بە ماڵپەڕی فەرمیی پارتی دیموكراتی كوردستانی ڕاگەیاند: "بەهۆی هەبوونی كێشە لە هێڵەكانی گواستنەوەی كارەبای نێوان شارەكانی كوردستاندا، كارەبایەكی كەمتر دەگاتە شاری دهۆك بەرانبەر بە شارەكانی دیكە و حكوومەتی هەرێمیش بۆ چارەسەركردنی ئەم كێشەیە هەنگاوی پێویستی ناوە."
سەرۆكی ئەنجومەنی پارێزگای دهۆك گوتی: "بەهۆی ئەو كێشەیەوە شاری دهۆك بەگشتی ڕۆژانە 14 كاتژمێر كارەبای نیشتمانیی هەیە، بەڵام لە شارەكانی دیكە نزیكەی 19 كاتژمێر كارەبای نیشتمانی هەیە، ئەمەش بووەتە هۆی ئەوەی هاووڵاتییان پارەی زیاتر بە خاوەن مووەلیدە ئەهلییەكان بدەن."
سەرۆكی ئەنجومەنی پارێزگای دهۆك ڕایشیگەیاند: "بەهۆی ئەو بڕیارەوە کە حكوومەتی هەرێمی كوردستان بۆ چاكردنەوەی هێڵەكانی كارەبا دەریكردووە، لە پێنج مانگی داهاتوودا ئەو كێشەیە بەتەواوی چارەسەر دەبێت، بۆ ئەم پێنج مانەگەش داوامان لە حكوومەت كردووە كە بڕی 5 ملیۆن لیتر گازوایل بە مووەلیدە ئەهلییەكان بدات، یان ئەو وێستگانەی دەكەونە سنووری دهۆك حكوومەت بە شێوەیەكی كاتی یەكەی زیاتر بەكار بخات بۆ ئەوەی هاووڵاتییان بڕێكی كەمتر پارەی مووەلیدە بدەن، یان هاوشێوەی شارەكانی دیكە پارە بدەن."
هێدی كاكەیی